O’zbekiston texnologik metallar kombinati va Xitoyning “PPP (Hong Kong) Ltd.” kompaniyasi vakillari o‘rtasida rasmiy uchrashuv tashkil etildi. Unda TMK tomonidan kombinatning hozirgi faoliyati va istiqbolli investitsiya loyihalarining taqdimoti o’tkazilib, hamkorlik uchun keng imkoniyatlar mavjudligi qayd etildi. Xususan, O‘zbekistonda yaratilayotgan qulay investitsiya muhiti haqida ma’lumot berilib, kritik xomashyo yo‘nalishida qo‘shma korxona tashkil etish taklifi ilgari surildi.
O‘z navbatida, “PPP (Hong Kong) Ltd.” vakillari kompaniyaning xrom, nikel va kobaltni qayta ishlash hamda ushbu metallar asosida mahsulot ishlab chiqarish bo‘yicha salohiyati va zamonaviy texnologiyalarga egaligini bildirdi. Kompaniya, shuningdek, O‘zbekistonda xrom xomashyosini qayta ishlab sof xrom ishlab chiqarishni yo‘lga qo‘yish bo‘yicha hamkorlikka tayyorligini ma’lum qildi.
Ma’lumot uchun, PPP (Hong Kong) Ltd. – Gonkongda ro‘yxatdan o‘tgan va xrom, nikel, kobalt kabi strategik metallar bilan ishlovchi xalqaro kompaniya bo‘lib, u Xitoy, BAA, Janubiy Afrika, Hindiston, Misr va Qozog‘iston kabi yirik bozorlarni qamrab olgan.
