Ўзбекистон геосиёсий саҳнада яна бир муҳим «чипта»ни қўлга киритди
ТМК Канададаги CMI аъзоси бўлди — Ўзбекистон критик минераллар бўйича глобал ҳамкорликда янги босқичга чиқмоқда.
Ўзбекистон критик минераллар соҳасида халқаро майдонда шиддат билан илгариламоқда. Бу жараёнларда соҳадаги етакчи компания — Ўзбекистон технологик металлар комбинати мамлакатни глобал ҳамкорликнинг муҳим марказларидан бирига айлантирмоқда. Хусусан, ТМК Канадада жойлашган Критик минераллар институти (CMI)нинг расмий аъзосига айланди.
Бунинг ортида қандай стратегик ютуқлар бор?
Критик минераллар институти глобал миқёсдаги интеллектуал ва стратегик марказ. Унда дунёнинг барча мамлакатларидан йиғилган саноат гигантлари, ҳукумат вакиллари, илмий марказлар ва инвесторлар биргаликда келажакнинг ресурс харитасини чизади. Хусусан, жорий йилда CMI томонидан эълон қилинган 23 та критик минераллар рўйхати бутун дунё технологик ривожланиш ва саноат сиёсатини белгилашда «йўл харитаси»га айланди.
«Биз ТМК учун Канада ва АҚШдаги етакчи компаниялар билан ҳамкорлик алоқаларини йўлга қўйишда кўприк вазифасини бажаришимиз мумкин. Шуни аниқ айта оламанки, Шимолий Америка компаниялари учун ҳам Ўзбекистон каби ишончли ҳамкор керак», — деди CMI бош директори Трейси Хюз хоним.
Халқаро институтга аъзолик Ўзбекистонни глобал критик минераллар элитасига олиб киришда сиёсий ва иқтисодий жиҳатдан муҳим аҳамиятга эга.
Жумладан, ТМК энди:
- АҚШ, Канада, Австралия, Европа ва Осиё давлатларининг ресурс стратегиялари бўйича ишончли манбадан тезкор маълумот олишга;
- Ўзбекистон конларида мавжуд бўлган ноёб элементларни халқаро таъминот занжирларига киритиш имкониятига;
- технология трансфери ва инвестициялар учун тўғридан-тўғри платформага;
- ҳар ҳафталик бозор тебранишлари, сиёсий қарорлар ва технологик янгиликлар таҳлил қилинган «Критик минераллар ҳисоботи»га эга бўлади.
Бу аъзолик орқали ТМК энди нафақат Ўзбекистон манфаатларини илгари суради, балки минтақавий барқарорлик ва глобал таъминот хавфсизлиги масалаларида ҳам ўз фикрини билдириш имкониятига эга бўлади.
