AQShning Massachusetts shtatida startaplar va innovatsiyalar bo'yicha eng yirik anjumanlaridan biri — TiECON EAST 2025 bo‘lib o‘tdi. O‘zbekiston texnologik metallar kombinati (TMK) delegatsiyasi ham mazkur nufuzli konferensiyada ishtirok etib, global hamkorlik aloqalarini yangi bosqichga olib chiqdi.
Anjuman doirasida TMK vakillari "Innospark Ventures" boshqaruv raisi janob Venkat Srinivasan bilan uchrashuv o‘tkazdi.
Muloqot davomida Massachusetts Institute of Technology (MIT) hamda UBS bilan hamkorlikda konchilik sohasida sun’iy intellekt texnologiyalarini tatbiq etish bo'yicha muhim kelishuvga erishildi.
Shuningdek, dastlab bu texnologiyani TMK tizimida pilot loyihasi sifatida sinovdan o‘tkazish va keyinchalik xalqaro bozorga chiqarishga kelishildi.
Ushbu hamkorlik Prezident Shavkat Mirziyoyev tomonidan belgilangan "ta’lim, ilm-fan va sanoat" zanjirini shakllantirish doirasida amalga oshirilmoqda.
Ma'lumot uchun, Innospark Ventures — Boston markazida joylashgan, sun’iy intellekt va ilmiy izlanishlarni qo‘llab-quvvatlash orqali iqtisodiyotning turli sohalarida yangi bozorlarni shakllantirayotgan yetakchi investitsiya kompaniyasi hisoblanadi.
