O‘zbekiston texnologik metallar kombinati (TMK) delegatsiyasi ayni kunlarda Niderlandiyada kritik minerallar, ilg‘or texnologiyalar va sanoat innovatsiyalari yo‘nalishida qator uchrashuvlarni o‘tkazib, muhim kelishuvlarga erishmoqda.
Tashrif doirasida Netherlands Enterprise Agency bilan kritik minerallar sohasiga investitsiyalar, grantlar va texnologiyalarni jalb qilish, shuningdek, konchilik va minerallarni qayta ishlashda AI va ishlab chiqarish analitikasi yo'nalishida faoliyat yurituvchi Optecs kompaniyasi bilan ishlab chiqarish jarayonlarini raqamlashtirish va avtomatlashtirish masalalari muhokama qilindi.
Shuningdek, Yevropaning yetakchi ilmiy markazlaridan biri sanalgan Delft Texnologiya Universiteti bilan ilmiy tadqiqotlar, texnologiyalar transferi va mutaxassislar tayyorlash, "SkyGeo" kompaniyasi bilan ESG monitoring va sanoat xavfsizligi, "Port of Rotterdam Authority" bilan kritik minerallar logistikasini rivojlantirish hamda "Moxba" kompaniyasi bilan smart mining va zamonaviy metall ajratish texnologiyalari bo‘yicha hamkorlik imkoniyatlari ko‘rib chiqildi.
Mazkur uchrashuvlar TMKning xalqaro hamkorlik geografiyasini kengaytirish, ilg‘or texnologiyalarni jalb qilish va O‘zbekistonning global kritik minerallar bozoridagi pozitsiyasini mustahkamlashga xizmat qilmoqda.
