Ayni paytda Kanadaning Toronto shahrida bo‘lib turgan O‘zTMK delegatsiyasi dunyoning yetakchi tashkilotlari bilan muzokaralar o‘tkazmoqda.
Shuningdek, alohida davra suhbatlari tashkil etilib, unda O‘zTMK bir qator xorijiy kompaniyalarni o‘zining faoliyat yo‘nalishlari va rejalari bilan tanishtirdi.
Davra suhbatlarida ishtirok etgan xalqaro kompaniyalar O‘zbekiston va O‘zTMK faoliyatiga katta qiziqish bildirib, mutaxassislarga murojaat qilishdi.
O‘zTMKning AQSHlik eksperti Han Ilhan ham kombinatning strategiyasi, kritik metallar sohasidagi loyihalari bo’yicha ishtirokchilarni tanishtirdi.
Shuningdek, O‘zTMK quyidagi yirik kompaniyalar bilan faol muzokaralar olib bordi:
- Nevada Lithium (AQSh) foydali qazilmalarni qidirish va rivojlantirish bilan shug‘ullanuvchi kompaniya bo‘lib, asosiy yo‘nalishi litiy qazib olish va uni qayta ishlash hisoblanadi.
- Avalon Advanced Materials (Kanada) barqaror resurslarni boshqarish va ularni qimmatli mahsulotlarga aylantirish orqali yashil iqtisodiyotga hissa qo‘shishni maqsad qilgan kompaniya.
- Rockmaster Resources Corp (Kanada) foydali qazilmalarni qidirish bilan shug‘ullanadi va Apex Resources bilan hamkorlikda volfram bo‘yicha izlanishlar olib bormoqda.
- West High Yield (Kanada) dunyoning eng yirik va ekologik toza magniy konlaridan biriga egalik qiladi. 4 yil ichida gidrometallurgiya ishlab chiqarish liniyasini ishga tushirish rejalashtirilgan.
- Energy Fuels (AQSh) toza energiya va harbiy sanoat uchun zarur bo‘lgan muhim strategik metallarni ishlab chiqarishga ixtisoslashgan.
O‘zTMK dunyoning bu kabi lider kompaniyalari bilan yangi muzokaralar o‘tkazishda davom etmoqda.
