"Oʻzbekiston Texnologik Metallar Kombinati" AJning oʻlchash vositalarini kalibrlash laboratoriyasi Oʻzbekiston akkreditatsiyalangan laboratoriyalar reyestriga kiritildi.
Mazkur akkreditatsiya sertifikati laboratoriyaga massa, bosim, harorat, geometrik va elektr kattaliklarini akkreditatsiya doirasiga muvofiq kalibrlash huquqini beradi. Bu esa kombinatning ishlab chiqarish va texnologik jarayonlarida qoʻllaniladigan oʻlchash vositalarining aniqligi va ishonchliligini ta’minlashga xizmat qiladi.
Bugungi kunda kombinatda 2385 ta oʻlchash vositasidan foydalanilmoqda. Ulardan 345 tasi majburiy davlat kalibrlashidan oʻtkazilishi lozim, 2040 tasi esa kombinantning kalibrlash laboratoriyasida tekshiruvdan oʻtkaziladi.
Ushbu akkreditatsiya kombinatga oʻlchash vositalarining davlat metrologiya xizmatlariga bogʻliq boʻlmagan holda, ichki laboratoriyada sifat nazoratini amalga oshirish imkonini beradi.
