OʻzTMK Boshqaruv raisining operatsion masalalar boʻyicha oʻrinbosari Ulugʻbek Roʻziyev hamda Neft va gaz konlari geologiyasi va qidiruvi instituti direktori O. Qarshiyev ishtirokida uchrashuv boʻlib oʻtdi.
Unda neft va gaz sohasida qazib olish jarayonida hosil bo‘ladigan suvlardan texnologik metallarni ajratib olish masalalari muhokama qilindi. Xususan, ushbu suvlardan litiy, yod va brom kabi qimmatbaho elementlarni ajratishning imkoniyatlari tahlil qilindi.
Litiy bugungi kunda yashil energetika rivojida strategik ahamiyatga ega bo‘lib, u elektrotransport vositalari va qayta tiklanuvchi energiya manbalarida ishlatiladigan batareyalarning asosiy komponenti hisoblanadi.
Yod va brom esa tibbiyot, kimyo sanoati va boshqa sohalarda keng qo‘llaniladi.
OʻzTMK bu tashabbus bilan neft va gaz sanoati chiqindilarini iqtisodiy qiymatga aylantirish orqali atrof-muhitga ijobiy ta’sir ko‘rsatishni maqsad qilgan.
