Qozog‘istonning Sharqiy Qozog‘iston viloyatida bo‘lib o‘tgan “Altay Invest-2025” xalqaro investitsiya forumida O‘zbekiston texnologik metallar kombinati (TMK) delegatsiyasi ham faol ishtirok etdi.
Xalqaro forum davomida qator B2B uchrashuvlar tashkil etilib, ularda texnologik va kritik minerallarni qayta ishlash, sanoat kooperatsiyasi istiqbollari muhokama qilindi.
Jumladan, TMK delegatsiyasi "Kazzinck" ва Ulba metallurgiya zavodi rahbariyati bilan xomashyoni chuqur qayta ishlash va mahsulot qiymat zanjirini kengaytirish bo‘yicha o‘zaro manfaatli hamkorlik yo‘nalishlarini muhokama qildi.
Uchrashuvlar natijasida mintaqa korxonalari bilan tantal, niobiy, berilliy, selen, surma, vismut, vanadiy, volfram va molibden kabi metallarni qayta ishlash va ishlab chiqarish, yangi konlarni o‘zaro o‘rganish, zamonaviy uskunalarni yetkazib berish masalalarida dastlabki kelishuvlarga erishildi.
Forum doirasida TMK vakillari Sharqiy Qozog‘iston viloyati hokimi Nurimbet Saktaganov bilan ham uchrashdi. Suhbat davomida O‘zbekiston va Qozog‘iston o‘rtasidagi strategik sheriklik, mintaqalararo aloqalarni mustahkamlash va o‘zaro ishonchni yanada rivojlantirish masalalari alohida ta’kidlandi.
