TXIF-2025 doirasida o'tkazilgan bugungi panel sessiyada TMK boshqaruv raisining maslahatchisi Han Ilhan nutq so'zlab, O‘zbekistonning boy geologik salohiyati va TMK tomonidan ishlab chiqilgan to‘liq qiymat zanjiriga asoslangan model haqida to‘xtaldi.
“TMK strategiyasi — bu an’anaviy konchilik modeli emas. Biz qazib olishdan tortib, qayta ishlash va tayyor mahsulot ishlab chiqarishgacha bo‘lgan barcha bosqichlarni o‘z ichiga olgan kompleks yechimni taklif etamiz,” — dedi Han Ilhan.
Uning ta’kidlashicha, TMK tomonidan rejalashtirilayotgan qayta ishlash markazlari “Texnopark” maqomida barpo etiladi va bu markazlar xorijiy ishlab chiqaruvchilarga barqaror metall ta’minoti, sarmoya kiritish va mahsulot yaratish uchun qulay muhit yaratadi.
“Biz hamkorlik deganda ‘2 + 2 = 22’ bo‘ladigan strategik sheriklikni nazarda tutamiz. O‘zbekistonning resurs bazasi ulkan va biz uni to‘liq qiymat zanjiri orqali dunyo bozoriga olib chiqmoqchimiz,” — deya Han Ilhan o'z nutqini yakunladi.
Shuningdek, panel sessiya davomida ishtirokchilar mavzu yuzasidan savol-javob va muhokamalar olib bordi. TMK modeli xalqaro ekspertlar tomonidan katta qiziqish bilan kutib olindi.
