TMK tasarrufidagi Nodir metallar va qattiq qotishmalar ishlab chiqarish zavodining yosh xodimi Baxtbek Ismailov zamonaviy texnologik uskunalarda volfram asosidagi tishli burg‘ilash tojlari hamda frezalovchi va kesuvchi detallarni tayyorlaydi.
Bu oddiy detallar emas, ular tog‘-kon sanoati va metallurgiyadagi murakkab ishlab chiqarish jarayonlarida qo‘llaniladigan, yuqori mustahkamlik va aniqlik talab qiladigan mahsulotlardir.
Eng muhimi, ushbu mahsulotlar O‘zbekistonda, TMKning sanoat obyektlarida to‘liq ishlab chiqarish zanjiri asosida xomashyodan tayyor mahsulotgacha yaratilmoqda.
«Bizning ishimizda aniqlik juda muhim. Ba’zan millimetrning kichik bir qismi darajasidagi aniqlik ham tayyor mahsulot sifati va katta ishlab chiqarish jarayonining uzluksiz ishlashiga ta’sir qiladi. Shuning uchun har bir detalga katta mas’uliyat bilan yondashamiz», — deydi Baxtbek.
Uning uchun TMKdagi faoliyat faqatgina ish joyi emas. Bu yangi texnologiyalarni o‘zlashtirish, zamonaviy uskunalar bilan ishlash va professional jihatdan o‘sish imkoniyati.
U o'z kasbini shunday e'tirof etadi: Men TMK jamoasining bir qismi ekanimdan faxrlanaman. Chunki biz shunchaki bugun uchun ishlamayapmiz — kelajak uchun yaratyapmiz.
