Mamlakatimizda yoshlarni qo‘llab-quvvatlash davlat siyosatining ustuvor yo‘nalishlaridan biri. Prezidentimiz tomonidan har haftaning payshanbasi “Yoshlar kuni” etib belgilanishi ham ana shu e’tiborning amaliy ifodasidir.
Mazkur tashabbus doirasida O‘zbekiston texnologik metallar kombinati (TMK) bosh ofisida Boshqaruv raisining yangi texnologiyalar, innovatsiyalar va sun’iy intellektni rivojlantirish bo‘yicha o‘rinbosari, ilg‘or materialshunoslik va muhandislik fanlari doktori (PhD) Amir Abidov yosh mutaxassislar bilan ochiq muloqot o‘tkazdi.
Uchrashuvda kritik minerallar sanoatining rivojlanish tendensiyalari, sun’iy intellekt, zamonaviy texnologiyalar va kelajak kasblari muhokama qilindi.
Amir Abidov bugungi raqobatning asosiy omili bilim, innovatsiya va texnologiyalar ekanini ta’kidlab, yoshlarni xorijiy tillar, raqamli texnologiyalar va sun’iy intellektni chuqur o‘zlashtirishga chaqirdi.
Ochiq muloqot yoshlarning taklif va tashabbuslarini tinglash hamda TMKdagi innovatsion muhitni yanada mustahkamlashga xizmat qildi.
