Seul shahrida O‘zbekiston va Janubiy Koreya o‘rtasidagi investitsiyaviy, texnologik va sanoat hamkorligini kengaytirishga qaratilgan O‘zbekiston–Koreya biznes uchrashuvi bo‘lib o‘tdi. Unda O‘zbekiston texnologik metallar kombinati (TMK) vakili ham ishtirok etdi.
Uchrashuvda o'zaro hamkorlikni yangi amaliy bosqichga olib chiqish, ilg‘or texnologiyalar transferi, yuqori qo‘shilgan qiymatli mahsulotlar ishlab chiqarish, yangi investitsiya loyihalarini amalga oshirish masalalari muhokama qilindi.
Ma'lumot uchun, bugungi kunda Janubiy Koreyaning O‘zbekistonga kiritgan investitsiyalari 8 milliard AQSH dollaridan oshgan, mamlakatimizda Koreya kapitali ishtirokidagi 725 ta korxona faoliyat yuritmoqda. Ikki tomonlama savdo hajmi esa qariyb 2 milliard AQSH dollariga yetgan.
Tashrif doirasida TMK delegatsiyasi Janubiy Koreyaning Savdo, sanoat va energetika vazirligi (MOTIE), KIGAM, YG-1, Potent Metals Corp., POSCO International hamda LS Group vakillari bilan ham alohida muzokaralar o‘tkazdi.
Muloqotlarda kritik minerallarni chuqur qayta ishlash, zamonaviy metallurgiya texnologiyalarini jalb etish, texnologiyalar transferi hamda yuqori texnologiyali mahsulotlar yaratish bo‘yicha istiqbolli hamkorlik yo‘nalishlari ko‘rib chiqildi va qator muhim kelishuvlarga erishildi
