Niderlandiya Qirolligining O‘zbekistondagi Favqulodda va Muxtor Elchisi Niko Sxermers boshchiligidagi Kritik xomashyo materiallari (CRM) savdo missiyasi O‘zbekiston texnologik metallar kombinatiga tashrif buyurdi.
Delegatsiya tarkibiga Rotterdam porti, JL MAG Rare Earths, WMC Group, Runz Holding va BeNeLux Savdo palatasi vakillari kirgan bo’lib, kritik minerallar, logistika va global ta’minot zanjirining muhim ishtirokchilarini birlashtirdi.
Uchrashuv davomida mehmonlarga TMKning investitsiya loyihalari portfeli, “Kelajak metallari texnoparki”, shuningdek, geologik qidiruvdan boshlab chuqur qayta ishlash va tayyor mahsulot ishlab chiqarishgacha bo‘lgan integratsiyalashgan qiymat zanjiri taqdim etildi.
Tomonlar kritik minerallar sohasidagi hamkorlik istiqbollari, batareya va elektromobillar uchun magnit materiallarini qayta ishlash, logistika va xalqaro ta’minot zanjirlarini rivojlantirish masalalarini muhokama qildi.
Uchrashuv yakunida kritik minerallar sohasida investitsiyalar, texnologiyalar va logistika imkoniyatlarini birlashtirish orqali yangi hamkorlik formatlarini rivojlantirishga kelishildi.
