O‘zbekiston texnologik metallar kombinati tasarrufidagi R&D Park delegatsiyasi yuqori texnologiyali materiallar va ularning sanoatga joriy etilishiga xizmat qiluvchi aniq hamkorlik mexanizmlarini shakllantirish maqsadida amaliy tashrif bilan Belarus Respublikasida bo'ldi.
Tashrif doirasida yetakchi ilmiy -texnik va ilmiy-ishlab chiqarish markazlari, xususan, Belarus Milliy fanlar akademiyasi, Belarus FAN Materialshunoslik bo‘yicha ilmiy-amaliy markazi, Belarus Fizika-texnika instituti, akademik O.V. Romanov nomidagi Kukunli metallurgiya instituti hamda “NPO Center” AJ bilan muzokaralar o‘tkazildi.
Muzokaralar quyidagi ustuvor yo‘nalishlarga qaratildi:
- sun’iy olmoslar va ilg‘or CVD qoplamalar;
- qattiq materiallar va kukunli metallurgiya texnologiyalari;
- additiv texnologiyalar (3D printing);
- plazma texnologiyalari va yangi avlod himoya qoplamalari.
Tashrif yakunida Belarus Milliy fanlar akademiyasi hamda akademik O.V. Romanov nomidagi Kukun metallurgiya instituti bilan hamkorlik memorandumlari imzolandi.
Unga ko'ra, qo‘shma ilmiy-tadqiqot (R&D) loyihalarini amalga oshirish bo‘yicha kelishuvlarga erishilib, texnologiya transferi va tajriba uchastkalarini yaratish yo‘nalishlari belgilandi.
Shuningdek, “NPO Center” AJ tomonidan O‘zbekistonda R&D PARK rezidenti sifatida faoliyatini tashkil etish bo‘yicha samarali muzokara olib borildi.
