_1779106213.jpg)
O‘zbekiston texnologik metallar kombinati (TMK) delegatsiyasi Buyuk Britaniyada o‘tkazilgan “Investorlar kuni” doirasida xalqaro investitsiyalar va strategik sanoat loyihalarini moliyalashtirish yo‘nalishida faoliyat yurituvchi investitsion kompaniya Kirkoswald Capital Partnership LLP bilan anglashuv memorandumi imzoladi.
Mazkur memorandum doirasida tomonlar muhim xomashyo va yuqori qo‘shimcha qiymatga ega texnologik metallar sohasida o‘zaro manfaatli hamkorlikni rivojlantirish, xalqaro bozorlarga mahsulot yetkazib berish zanjirlarini shakllantirish, investitsiya loyihalarini amalga oshirish hamda qo‘shma korxona tashkil etish imkoniyatlarini o‘rganishga kelishib oldilar.
Shuningdek, hujjat doirasida TMK bazasida zamonaviy texnologiyalarga asoslangan qo‘shma loyihalarni amalga oshirish, ishlab chiqarish quvvatlarini kengaytirish, qayta ishlash darajasini chuqurlashtirish va xorijiy investitsiyalarni jalb qilish masalalari bo‘yicha hamkorlik qilish nazarda tutilgan.
Bundan tashqari, TMK delegatsiyasi “Investorlar kuni” doirasida J.P. Morgan, BlackRock, Wellington Management Company LLP, Ashmore Investment Management, T. Rowe Price Associates hamda AXA Investment Management kabi dunyoning yetakchi investitsiya va moliyaviy institutlari bilan muzokaralar o‘tkazdi.
TMK tomonidan xalqaro kapital bozorida yevrobondlarning muvaffaqiyatli joylashtirilishi ortidan mazkur kompaniya va investorlar bilan investitsiyalarni jalb qilish, qo‘shma loyihalarni amalga oshirish hamda strategik hamkorlikni rivojlantirish bo‘yicha muzokaralarga erishildi.
