Toshkent xalqaro investitsiya forumi (TIIF) doirasida O‘zbekiston texnologik metallar kombinati (TMK) va Fransiyaning yetakchi moliyaviy konglomerati Société Générale banki o‘rtasida 50 million yevro miqdorida eksportoldi moliyalashtirishni (PXF) jalb etish bo‘yicha mandat kelishuvi imzolandi.
Ushbu kelishuv ikki tomonlama hamkorlikni yo‘lga qo‘yishdagi muhim qadam bo‘lib, TMKning xalqaro kapital bozorlaridagi nufuzini mustahkamlashga va keng ko‘lamli loyihalarni amalga oshirishda uzoq muddatli xalqaro moliyaviy mablag‘larni jalb qilishga xizmat qiladi.
Jalb etilayotgan mablag‘lar kombinatning ishlab chiqarish salohiyatini oshirish hamda yuqori qiymatli mahsulotlar eksport geografiyasini kengaytirishga yo‘naltiriladi.
Mazkur kelishuv O‘zbekiston Respublikasining yuqori texnologik metallurgiya sanoatini yangi bosqichga olib chiqish va mamlakatning global ta’minot zanjiridagi o‘rnini mustahkamlashda strategik ahamiyatga ega.
