O‘zbekiston texnologik metallar kombinati Janubiy Koreyada Center for Advanced Materials and Parts of Powder (CAMP²) hamda Korea Powder Metallurgy kompaniyalari bilan ilg‘or kukun metallurgiya va magnit materiallar sohasida hamkorlik memorandumini imzoladi.
Hamkorlik kamyob yer elementlari (REE) asosidagi magnit materiallar va kukun metallurgiya texnologiyalarini rivojlantirishga qaratilgan.
Tomonlar yuqori samarali magnit kukunlar, yuqori soflikdagi magnit detallar hamda REE asosidagi sanoat komponentlarini O‘zbekistonda barqaror ishlab chiqarishni yo‘lga qo‘yishni maqsad qilgan.
Memorandum doirasida tomonlar:
➡️ Kukun metallurgiya va kamyob yer elementlar asosidagi magnit materiallar sohasida ilg‘or texnologiyalar transferini amalga oshirish;
➡️ Magnit kukun materiallar, yuqori sof magnit materiallar hamda yangi turdagi materiallarni ishlab chiqish;
➡️ Ilg‘or texnologiyalarni pilot va sanoat miqyosida joriy etish hamda ularni mahalliylashtirish dasturlariga adaptatsiya qilish;
➡️ O‘zbekistonda kamyob yer elementlari magnit materiallari texnologiyalarini joriy etish;
➡️ Stajirovkalar, sanoat amaliyotlari va ekspertlar almashinuvini yo‘lga qo‘yish yo‘nalishlarida hamkorlik qiladi.
Shuningdek, tomonlar kukun metallurgiya sohasida amaliy ilmiy tadqiqotlar olib borish, qo‘shma grant loyihalarida ishtirok etish, laboratoriya sinovlari va materiallar xarakteristikasini baholash, ilmiy maqolalar va patent faoliyatini rivojlantirishga kelishib oldilar.
Ma'lumot uchun, CAMP² — Janubiy Koreyaning ilg‘or materiallar muhandisligi, kukun metallurgiya va magnit materiallar ishlab chiqish sohasiga ixtisoslashgan yetakchi ilmiy-tadqiqot markazi. Markaz fundamental va amaliy tadqiqotlarni sanoat ehtiyojlari bilan uyg‘unlashtirish hamda texnologiyalarni tijoratlashtirishga yo‘naltirilgan.
