O‘zbekiston texnologik metallar kombinati (TMK) bosh ofisida Yaponiyaning texnologik metallar va yuqori qo‘shilgan qiymatli sanoat mahsulotlari ishlab chiqarishga ixtisoslashgan yirik kompaniyalari — Advanced Material Japan Corporation hamda Central Glass Co., Ltd. vakillari bilan uchrashuv bo‘lib o‘tdi.
Muloqot davomida volfram mahsulotlarini Yaponiyaga eksport qilish, kritik metallar bozoridagi zamonaviy tendensiyalar, sanoat hamkorligini rivojlantirish istiqbollari hamda TMK tomonidan amalga oshirilayotgan investitsiya loyihalari muhokama qilindi. Tomonlar o‘zaro manfaatli hamkorlikni rivojlantirish bo‘yicha kelishuvga erishdi.
Ma'lumot uchun, Advanced Material Japan Corporation Yaponiyaning noyob va texnologik metallar savdosi hamda global ta’minot zanjirlari boshqaruviga ixtisoslashgan kompaniyasi hisoblanadi. Kompaniya volfram, tantal, titan, germaniy, galliy va boshqa materiallar bilan ishlaydi.
Central Glass Co., Ltd. Yaponiyaning yirik kimyo va maxsus materiallar ishlab chiqaruvchilaridan biri bo‘lib, yarimo‘tkazgichlar, elektron materiallar, maxsus kimyoviy mahsulotlar va energiya sanoati uchun innovatsion yechimlar ishlab chiqaradi.
