O‘zbekiston texnologik metallar kombinati (TMK) bosh ofisida Germaniyaning eng yirik moliyaviy institutlaridan biri — LBBW Landesbank vakillari bilan uchrashuv bo‘lib o‘tdi.
Muzokaralar davomida eksport moliyalashtirish mexanizmlari, xususan EPC+F (Engineering, Procurement, Construction + Financing) modeli asosida sanoat va investitsiya loyihalarini moliyalashtirish masalalari muhokama qilindi. Bank vakillari dastlabki bosqichda qariyb 20 million yevro miqdoridagi EPC+F loyihalarini moliyalashtirish imkoniyatlarini ko‘rib chiqishga tayyor ekanliklarini bildirdilar.
Shuningdek, kelgusida yanada yirik hajmdagi kredit resurslarini jalb qilish, xalqaro moliyaviy instrumentlarni joriy etish hamda uzoq muddatli investitsion hamkorlikni rivojlantirish istiqbollari yuzasidan fikr almashildi.
Uchrashuv yakunida tomonlar eksport moliyalashtirish, investitsiya loyihalarini qo‘llab-quvvatlash hamda TMKning yirik sanoat tashabbuslarini xalqaro moliya bozorlari bilan integratsiya qilish bo‘yicha hamkorlikni bosqichma-bosqich kengaytirishdan manfaatdor ekanliklarini ta’kidladilar.
Ma'lumot uchun, LBBW — Germaniyaning eng yirik federal banklaridan biri bo‘lib, sanoat, infratuzilma, xalqaro savdo va eksport operatsiyalarini moliyalashtirish yo‘nalishida katta tajribaga ega. Bank bugungi kunda mashinasozlik, energetika, yuqori texnologiyalar hamda kritik xomashyo sohalaridagi yirik xalqaro loyihalarda faol ishtirok etib kelmoqda.
