Dilrabo Usmanova salkam 20 yildan beri bitta sohada mehnat qiladi. Uning qo‘lidan chiqqan mahsulotlar bugun jahon bozoriga eksport qilinmoqda.
Dilrabo — O‘zbekiston texnologik metallar kombinati (TMK) tasarrufidagi Nodir metallar va qattiq qotishmalar ishlab chiqarish zavodida ishlov beruvchi. U har kuni muhim strategik xomashyolar — volfram hamda molibden qotishmalari va shtabik briketlarini tayyorlashda qatnashadi.
“TMK tashkil etilgandan so‘ng mahsulotlarimizga bo‘lgan talab yanada ortdi, har xil davlatlardan so‘rovlar kelmoqda. Ish sharoitlarimiz yaxshilanib, yangi texnologiyalar kirib kelmoqda. Yaratib berilgan xavfsiz va zamonaviy sharoitlarda ishlaganing sari odamda zavq paydo bo‘ladi, yanayam ishlaging keladi”, deydi u.
Ammo uning uchun bu ish faqat jarayondan iborat emas. Bu — cheksiz g‘urur!
“Mahsulotlarimiz Kanada, Shveysariya, Italiya kabi davlatlarga eksport qilinayotganini ko‘rib juda xursand bo‘laman. Chet elga ketayotgan mahsulotda ozgina bo‘lsa ham mening hissam borligi, u mening qo‘limdan o‘tayotgani men uchun katta g‘urur.
Mustaqilligimizning 35 yilligi nishonlanadigan ushbu qutlug‘ davrda O‘zbekistonimiz sanoati va TMK jadal rivojlanayotgan bir paytda, ushbu jarayonning bir qismi bo‘lib mehnat qilayotganimdan baxtiyorman!”
