24–25-iyun kunlari Turkiyaning Anqara shahrida tog‘-kon sanoatining nufuzli xalqaro tadbirlaridan biri MINEX Asia 2026 "Qit'alarni bog‘lash: O‘rta yo‘lak bo‘ylab barqaror tog‘-kon ekotizimini barpo etish" shiori ostida o'tkazildi.
O‘zbekiston texnologik metallar kombinati (TMK) delegatsiyasi forum doirasida bir qator yetakchi xorijiy kompaniyalar, investorlar va xalqaro hamkorlar bilan istiqbolli muzokaralar o‘tkazdi.
Forumning "Rudadan tayyor mahsulotgacha: Markaziy Osiyo tog‘-kon sanoatida operatsion texnologiyalar va qiymat zanjiri integratsiyasi" mavzusidagi panel sessiyasida TMK tasarrufidagi Kelajak metallari texnoparki direktor o‘rinbosari Umid Saloxutdinov asosiy spiker sifatida ishtirok etdi.
U o‘z ma’ruzasida Kelajak metallari texnoparkining nodir yer elementlarini qazib olishdan boshlab ularni yuqori qo‘shimcha qiymatli mahsulotlargacha bo‘lgan qiymat zanjirini qisqartirishdagi o‘rni, ishlab chiqaruvchilar uchun zamonaviy texnologik yechimlar yaratish hamda qayta ishlash sanoatini rivojlantirishdagi ahamiyatini yoritib berdi.
MINEX Asia 2026 forumidagi ishtirok TMKning xalqaro hamkorliklarini yanada kengaytirish, ilg‘or texnologiyalarni jalb etish va O‘zbekistonning kritik minerallar sohasidagi salohiyatini xalqaro maydonda namoyish etish yo‘lidagi navbatdagi muhim qadam bo‘ldi.
