Qarshiboy aka uchun texnogen chiqindilarni qayta ishlash oddiy ish emas. Bu — mustaqil Vatanimiz boyliklarini asrash va uning farovonligiga hissa qo'shish imkoniyati.
Har kuni u murakkab texnologik liniyalarni boshqarib, sanoat chiqindilaridan yuqori sifatli volfram konsentratini ajratib oladi. Gravitatsiya va flotatsiya kabi murakkab jarayonlarni boshqarish — yuqori aniqlik, sabr va ko'p yillik tajriba talab qiladi.
Qarshiboy Usmonov — O‘zbekiston texnologik metallar kombinati (TMK) fabrikasining 30 yillik tajribaga ega, 60 yoshli yetakchi muhandislaridan biri.
“Texnologik liniyada volfram ajratib olganimizdan so'ng, mahsulot sifati va hajmi oshadi, yo'qotishlar esa kamayadi. Sanoatimizdagi bunday ochiq va to'g'ri siyosat xorijiy investorlarning ishonchini oshirib, keng hamkorlik va yangi ish o'rinlari yaratilishiga xizmat qilyapti”, — deydi u.
Ammo uning uchun bu ish faqat qoldiqlardan metall ajratib olishdan iborat emas. Bu — o'z yurtiga xo'jayin bo'lish va ustozlik faxri!
“Barcha yurtdoshlarimizni yaqinlashib kelayotgan Mustaqilligimizning 35 yilligi bilan chin yurakdan tabriklayman! Mustaqil davlatda o'z tilimizda gapirib, o'z ishimizning xo'jayini bo'lib ishlash — hammamiz uchun berilgan eng ulug' ne'matdir. Yoshim 60 da bo'lsa ham izlanishdan aslo to'xtamayman, chunki qiziquvchan yoshlarimizga bor tajribamni o'rgatish orqali biz shunchaki bugun uchun emas — kelajak uchun ishlayapmiz.”
