O‘zbekiston texnologik metallar kombinati (TMK) Ilmiy tadqiqot, innovatsiya va yangi texnologiyalar faoliyatini muvofiqlashtirish bo‘limi rahbari Farhod Azimov hammuallifligidagi ilmiy tadqiqot barqaror kimyo va energiya texnologiyalari yo‘nalishida yetakchi Q1 toifasidagi nufuzli xalqaro jurnal — "ChemSusChem"da e’lon qilindi.
"ChemSusChem" — Germaniyada joylashgan Wiley-VCH nashriyoti tomonidan Chemistry Europe ilmiy platformasi doirasida chop etiladigan nufuzli jurnal bo‘lib, unda e’lon qilingan tadqiqotlar global ilmiy va sanoat hamjamiyati uchun yuqori ahamiyatga ega.
Mazkur tadqiqot doirasida NiFe₂O₄ (nikel–temir oksidi) asosidagi elektrokatalizatorlarni sintez qilishning oddiy va samarali “one-pot” usuli ishlab chiqildi.
Tadqiqot natijalari metall → oksid o‘tish jarayonini boshqarish orqali defektlarga boy, yuqori samarali elektrokatalizatorlar yaratish mumkinligini ko‘rsatadi. Bu esa kelajakda vodorod energetikasi va suvni parchalash texnologiyalari uchun yangi materiallar ishlab chiqishda muhim ilmiy asos bo‘lib xizmat qiladi.
Mazkur chiqish TMKning ilmiy-tadqiqot salohiyati, ilg‘or materiallar yaratish yo‘nalishi va global ilmiy hamkorlikdagi ishtirokini yanada mustahkamladi.
