21–25-may kunlari Xitoy Xalq Respublikasining Sian shahrida Uchinchi O‘zbekiston–Xitoy hududlararo hamkorlik forumi hamda O‘ninchi Ipak yo‘li xalqaro ko‘rgazmasi bo‘lib o‘tdi.
Forum O‘zbekiston Respublikasi Bosh vazirining o‘rinbosari Jamshid Xo‘jayev boshchiligidagi delegatsiya ishtirokida o‘tkazildi. O‘zbekiston texnologik metallar kombinati (TMK) mazkur tadbirda muvaffaqiyatli ishtirok etib, O‘zbekistonning kritik minerallar va yuqori qo‘shilgan qiymatli sanoat mahsulotlari bo‘yicha salohiyatini namoyish etdi.
Shuningdek, tadbir doirasida tashkil etilgan “O‘zbekiston milliy paviloni” 2000 kvadrat metrdan ortiq maydonni egallab, mamlakatimizning tog‘-kon sanoati, metallurgiya, kimyo, ipakchilik va hunarmandchilik yo‘nalishlaridagi eksport va investitsiya salohiyatini namoyish etdi.
Forum davomida TMK bir qator yirik kompaniyalar bilan muzokaralar olib borib, istiqbolli hamkorlik imkoniyatlarini muhokama qildi hamda muhim kelishuvlarga erishdi.
Shuningdek, mazkur forumda Alibaba.com xalqaro platformasida O‘zbekiston milliy pavilyonining ishga tushirilgani hamda “100 ta Alibaba akseleratori” dasturining boshlanishi e’lon qilindi. Bu esa O‘zbekiston ishlab chiqaruvchilari, xususan, TMK uchun ham global elektron tijorat bozorlariga chiqish imkoniyatlarini yanada kengaytiradi.
