O‘zbekiston texnologik metallar kombinati (TMK) bosh ofisida Buyuk Britaniyaning O‘zbekistondagi elchixonasi ko‘magida Buyuk Britaniyaning Astera Minerals hamda Kanadaning RJLL Drilling kompaniyalari vakillari bilan istiqbolli hamkorlik masalalariga bag‘ishlangan uchrashuv bo‘lib o‘tdi.
Delegatsiyaga Kanadaning RJLL Drilling kompaniyasi prezidenti David Bradley hamda Buyuk Britaniyaning Astera Minerals kompaniyasi asoschisi Elena Baranova boshchilik qildi.
RJLL Drilling Kanada geologik burg‘ilash xizmatlari bozoridagi tajribali kompaniyalardan biri bo‘lib, yer usti va yer osti kern burg‘ilash, chuqur burg‘ilash, murakkab geografik sharoitlarda geologik qidiruv ishlarini amalga oshirish hamda foydali qazilmalar resurslarini aniqlash va kengaytirishga ixtisoslashgan. Kompaniya tasarrufida 47 ta zamonaviy burg‘ilash qurilmasi mavjud bo‘lib, yiliga 600 ming metrdan ortiq burg‘ilash ishlarini bajarish quvvatiga ega.
Astera Minerals esa Buyuk Britaniyada faoliyat yurituvchi xalqaro konsalting va loyiha boshqaruvi kompaniyasi bo‘lib, geologiya, tog‘-kon sanoati, kritik minerallar va investitsiya loyihalarini rivojlantirish yo‘nalishlarida xalqaro hamkorlikni yo‘lga qo‘yishga ixtisoslashgan. Kompaniya xorijiy investorlar bilan aloqalarni mustahkamlash hamda istiqbolli tog‘-kon loyihalarini qo‘llab-quvvatlash bo‘yicha faoliyat olib boradi.
Uchrashuv davomida geologik-qidiruv ishlarini zamonaviy texnologiyalar asosida rivojlantirish, burg‘ilash jarayonlariga ilg‘or yechimlarni joriy etish hamda uzoq muddatli sanoat hamkorligini yo‘lga qo‘yish istiqbollari muhokama qilindi.
TMK mazkur kompaniyalar bilan geologik kern burg‘ilash, Reverse Circulation (RC) burg‘ilash, geofizik tadqiqotlar hamda jinslarning geokimyoviy tahlili yo‘nalishlarida hamkorlikka alohida qiziqish bildirdi.
