O‘zbekistonning kritik minerallar sohasidagi ochiqlik va xalqaro hamkorlik siyosati doirasida TMK vakillari Buyuk Britaniyada bo'lib, yetakchi injenering va mineral resurslarga ixtisoslashgan kompaniyalar bilan uchrashuvlar o‘tkazdi. Tashrif Britaniyaning O‘zbekistondagi elchixonasi ko‘magida, Cornwall Mining and Geo-Resources Alliance bilan hamkorlikda tashkil etildi.
Dastlab SLR Consulting Limited faoliyati o'rganilib, kompaniyaning yetakchi mutaxassisi Garfild Styuart bilan gidrometallurgiya va mineral qayta ishlash jarayonlarida qo‘llaniladigan ilg‘or muhandislik yechimlari muhokama qilindi.
Shuningdek, global miqyosdagi nufuzli injenerlik markazlaridan biri — Paterson & Cooke kompaniyasi rahbariyati bilan o‘tkazilgan uchrashuvda Paul Eynsvort va kompaniyaning global bosh direktori Stiv Uilson bilan texnologiya, mineral qayta ishlash va texnik hamkorlik yo‘nalishlari bo‘yicha muloqot olib borildi.
Tashrif davomida TMK vakillari Konvoll mintaqasidagi qazilma resurslar ekotizimini birlashtiruvchi Cornwall Mining and Geo-Resources Alliance hamda materialshunoslik va mineralogiya bo‘yicha yuqori aniqlikdagi tahlillarni amalga oshiruvchi Petrolab UK Ltd laboratoriyasi faoliyati bilan tanishdi.
Tashrif yakunida britaniyalik hamkor kompaniya vakillariga TMKning to'liq qiymat zanjiridagi faoliyati, yirik loyihalari, Texnopark ekotizimi va O‘zbekistonning texnologik metallar bo‘yicha yo‘nalishlarini qamrab olgan kengaytirilgan taqdimot namoyish etildi.
Tomonlar volfram gidrometallurgiyasi, qo'shma tadqiqotlar va kadrlar tayyorlash yo'nalishlarida hamkorlikni chuqurlashtirishga kelishib oldilar.
_1764332637.jpg)
